誠俊哥初遇**林寶堅尼**

嘩~~林寶堅尼呀~~
阿誠俊哥幾時同城城做左車友仔架!!??
幾時車媽咪兜返轉呀???

話說我地係Myer玩具部見到呢架堅既林寶堅尼.....玩具車~
梗係俾阿仔去坐下，玩下先喇~~

佢真係好識扮pose，

一隻手揸軚盤，一隻手放車門再"崖"個身出d，
再加埋個招牌笑容~~
媽媽我都真係要寫個"服"字~~




呢張意外咁打埋燈，十足好似明星出巡咁~~~

誠俊一坐落去就真係車神上身咁，
不停摟個軚盤~~

 

呢架車仔要用電既，不過唔係用電芯，係叉電，
叉完電，踩脚制就會行~~

不過誠俊太細，唔夠脚長去踩脚制，
事關架車係俾4歲以上既小朋友玩~~


唔好以呢架車仔打正林寶堅尼呢個名就好貴~
其實佢特價之後都只係AU$199~~
呢個價錢真係好吸引~~

不過因為公公話左唔好買咁多玩具俾呢個小朋友,
加上佢又太細未識玩，所以最後無買~~

誠俊哥一歲生日會 -- 邀請大家一齊黎慶祝

誠俊哥一歲生日會今個星期六就係喇~~

媽咪而家送張邀請卡俾各位BLOG友，
大家到時早D到，唔洗帶禮物喇，
大家咁FD，一句生日快樂都夠囉~~

(大家見到張卡，估唔估到個party theme 係咩呢???)

媽媽呢個星期已經開始拾屋，
前晚就拆晒之前網上買既佈置出黎，
預下D位置，睇下夠唔夠~

尋日有時間重去Party supply果度訂氣球，
我地訂DIY package, au$80 有一枝氣，50個波, 絲帶同扣~

而家食物方面，最後我地放棄大部分既自家煮，
改為叫到會，因為人數太多，成40人，
真係無可能煮咁多，
所以到會方便簡單d~~

不過都會預先煮幾樣野，
主要係俾小朋友，
因為小朋友都係唔好食太多街外野比較好~~

小朋友menu,
我會整薯蓉栗米杯，
茄汁雞肉意粉，
同白烚蔬菜~

大人menu都好豐富~
我地叫左馬來西亞餐到會，
而自家準備會有可樂雞翼，BBQ蒜蓉大蝦~

而家最需要既係好天氣~~
一定要出太陽呀~~~
唔好太大風，咁小朋友就可以多d地方玩~~~

媽媽學種菇

誠俊媽上個月開始迷上左種菇呢樣新玩意，
個"菇塔"係係Market買既，
因為呢邊買菇食一d都唔平，d 秀珍菇au$3先得個少少，
所以見到Market可以買黎自己種，即買黎試下~

呢幾張相係上個月第一個菇種塔出既，
好大隻，好靚仔~~

 

我個電話比下，就知佢地真是幾大隻~~



呢個只係前面，後面重有一大堆~~

一個"菇塔"可以種大約4-5個禮拜，
賣果個話有2 - 3造，中間會有幾日休息期，
但我覺得佢係不停生，
不停都有標新芽，
生到多到食唔晒咁濟~~

今次見到再買多個，
等嫲嫲都可以睇下我地無聊既種菇玩意~~

"菇塔"買返黎係一大盒既，
我地要準備既係一個大膠箱同埋濕報紙~

打開個盒，見到個"菇塔"被個膠袋包住~~

 

將個"菇塔"放係濕報紙上面，再沿住的黑線剪開d膠袋~~

 

切開d膠袋，搞到佢"fing fing"下先係好~~~

呢d就係菇菌~~
只要每日噴水，放係通風又有少少陽光既地方都ok~

希望d個"菇塔"會好似上一個咁生多d菇菇~
因為呢排天氣開始凍，我想要新鮮菇菇打邊爐~~~

誠俊哥剪髮記~

誠俊出世咁耐，都未剪過頭髮，
本來諗住過左一歲生日先剪，
但呢期佢D頭髮明顯太長，搞到個樣都有D蠢~~

所以睇完袋鼠返屋企，
嫲嫲都操刀(剪刀)，幫誠俊剪第一次頭髮~~

為左仔仔可以坐定定，
爸爸準備左佢最鐘意，
亦都係暫時唯一爸爸俾佢睇既卡通 --- In the Night Garden

佢一有電視睇，就會好乖咁坐定定，
但有時當D主角唱歌仔有音樂既時候，
佢都會手舞足蹈~~

 

呢個小朋友第一次頭髮都好乖，
好合作咁專心睇電視~~
大約10分鐘到就搞掂，前後左右都修短左，
感覺整齊左，無之前咁"不羈"~~~

其實成個過程係好快，
我係廚房整緊晚餐(明顯背境影到~)
都未黎得切去睇，佢地經已剪好~~
所以我都係睇相先知當時情況~~

Perth 一日精華遊 (Swan Valley酒莊區+ 親親小袋鼠)

嫲嫲同e婆咁遠黎探我地，我地當然要帶佢地四圍玩下先得喇~
今個星期六，我地去左Market、Swan Vallry酒莊區同睇袋鼠~~

食早餐之後，第一站去左我地最喜歡既Manning market
以前誠俊都係坐bb車，今次就可以落地自己行喇~~
佢今日帶既鴨鴨口水肩好可愛~~~




行行下，有個鬼妹仔走過黎同誠俊玩，
點知呢個仔怕羞wor~~

淨係肯離遠咁同人地對望~~

爸爸鼓勵佢行前d同人地玩，

點知佢重倒後行~~~



個鬼妹仔其實都好可愛，
但仔仔就唔知點解一反常態，
唔同人玩~~

行完一上車誠俊就訓著覺，
所以我地估佢可能眼訓攰，所以無心情同人玩~~

我地第2站先去city訂誠俊既生日旦糕，再去Swan Valley~~

到Swan Valley都1:00pm，所以一於食個lunch先再行~
係Elmar's食德國野飲啤酒~

  

其實呢間既德國咸豬手都好好食，
但相比之下，上次係Sydney 食既好似重正d~~~

食咸豬手有酸椰菜做配菜,
阿誠俊哥咁為食，我就俾左d佢試下~~
跟住佢就.......

酸都拎晒頭，好肉緊咁~~~
唔好以為佢咁樣就唔食，
其實佢拎完頭仍然繼續食~~
哈哈~~

食飽之後係餐廳後面既草地行下，曬曬太陽~

而家佢行得好好架喇~~
俾條片大家睇下~
Swan Valley除左大小不同既酒莊，重有朱古力廠，同Honey farm~
大部份都係免費試飲試食~~
我地去左太多次，而家多數只會去1-2間喜歡既，試啱就買~

我地最喜歡olive farm ~
出面零售無得賣~
無咩marketing, 無廣告，
但佢既酒我地好鐘意~
屋企酒架1/3都係佢既出品~

飲飽食醉，我地係太陽落山之前去睇袋鼠~~

Heirisson island係perth市中心一個大島，
外表同一個公園無分別，
但佢就有一部分地方圍起左養住6-8隻袋鼠，
提供俾市民一個免費近距離親親袋鼠既機會~
我知道呢個地方好耐，但今次都係第一次去~~

之前聽人講d袋鼠有時會"哩埋"，可能要D時間搵下先見到~
我地今日好好彩，一入去就見到4隻~~

呢幾隻都係細隻既bb袋鼠~~
好乖好靜~~
我地係地下見到工作人員放低既糧，
就攞起少少餵佢，影下相~~
(呢度唔可以帶野食餵袋鼠架~~)

誠俊第一次見袋鼠，開始既時候就坐係BB車度睇~

睇左陣，我地見隻袋鼠都好乖，
又見仔仔唔驚，
所以就抱仔仔去摸下袋鼠~~

 

誠俊都好乖，佢都只係細細力去摸下~
都無大力打佢~~

但袋鼠仔就掛住食，無理過我地~~