10月事件一品鍋

今個10月真係忙到不得了, 好多野忙, 真係打BLOG既時間都無~~

除左媽媽一直都家庭工作兩邊忙之外,
爸爸既教練工作又因為多左華人學潛水,
公司要將本身既宣傳野/文件翻譯成中文, 而呢D野唔知點解又變左我既工作, 所以今個月真係超級忙~~

雖然好忙, 但都要簡單記錄一下呢幾星期既事, 以下打既內容可能好亂,
但為俾我將來睇返誠俊既成長記錄, 亂都要打一次~~
大家BLOG友見諒, 哈哈～～

呢幾星期去左比比姐姐屋企玩好幾次, 去探比比婆婆, 等婆婆開心D, 無咁悶~
但比比姐姐都重係唔肯SHARE D 玩具俾誠俊玩,
每次見面都要同佢說教一輪, 先肯同誠俊一齊玩~~
相反誠俊一次俾一次醒, 之前俾姐姐搶玩具, 咩反應都無,
只係識企係度呆, 再走去玩其他玩具, 再被搶.......
過一排之後, 再一齊玩, 佢知道自己玩緊既玩具被搶, 會識得喊,
知道玩具被搶無得玩, 但都未識反抗.....

到最近一次, 誠俊玩緊塊神奇畫板, 又俾姐姐一手搶左去,
阿仔今次終於學識反抗, 除左大喊之外, 重識揸實枝筆, 同姐姐鬥過,
一個揸住畫板, 一個揸住筆, 大家都唔放手, 一個大喊作投訴, 一個就大叫"it's mine"~~ 情況搞笑~~
學習分享, 學習一齊玩, 呢個係小朋友之間既必經階段,
有時唔太過分, 我都只會從旁睇, 由得佢地"私了" [哈哈]

呢2張相, 你地見到佢地咁"和諧" 同"平靜" 咁相處,
其實相既背後有唔少"打鬥場面"架~~ [爆]

 

除左去姐姐度, 最近都去左Lucas lll 弟弟度玩,

係弟弟屋企玩, 情況唔同晒~~

因為Lucas lll 得5個月大, 唔會同誠俊爭玩具,

同時誠俊又好似好識性咁, 唔會去搶弟弟既野,

定係暫時唔識呢??咁就唔知喇~~ 哈哈~

 

EE俾借弟弟既搖搖蟲俾誠俊玩,

佢好ENJOY咁自己係咁"CHOK"~~

 

輪到弟弟玩既時候,

佢就企住旁邊睇, 幫手搖~~

 

 

今個月, 有一件大事發生, 就係換左架新車,

新車落地, 當然要經常幫佢洗白白,
KEEP 住佢白雪雪既靚仔樣~~

 

 

見到水就開心到癲既誠俊,

佢可能諗住都幫手洗車,

不過, 佢好似"獵"錯"架餐"wor~~

 

都唔知點解而家upload D相咁細張,

有無人知道點樣可以整大張D??

 

誠俊頂帽係又係婆婆既溫暖牌,

超勁既手工!! 讚讚!!

 

 

最喜歡食既仔仔,

呢期開始有自好強既主見,

次次都要自己食,

唔鐘意人地餵,

所以呢輪呢個場面經常出現.....[唉]

 

上星期4開始仔仔因為玫瑰疹所以發高燒,

雖然精神重可以, 但發高燒心情總係麻麻,

所以係佢星期日出疹退燒, 好返少少,

就攞個新玩具俾佢玩,

沖喜下~

哈哈哈哈~~

 

呢套煮飯仔上次5月大減價果陣買,

成套包埋食物都係AU$20,

平到不得了~~

 

其實細個果陣我都好想要一套咁既煮飯仔,

所以我都玩得好開心,

個爐頭有燈, 又會發聲,

$20 勁勁勁勁抵買!!!!!!

 

為左投入D, 專情俾條大既口水堅佢帶住扮圍裙,

似模似樣呢??

佢玩得不知幾開心~~~

 

 

 

買新鞋+ 跑公園~~

上星期日, 爸爸出海教潛水, 我同仔仔自己搵節目~~

我地約埋2個靚姐姐朋友出去玩~~

今次去左一個超高級商場, 係Claremont~

 

呢度真係好鬼high,

同我地平時行開既完全唔同FEEL~~~

 

 

 

 

 

今日天氣好好, 姐姐同誠俊影左好多靚相~~

係戶外餐廳食野,

走黎走去, 好開心!!

 

高級商場既鋪頭真係好唔同,

俾我搵到間專買小朋友鞋仔既鋪頭,

係perth真係好難買靚既bb鞋,

今次當然唔會錯過喇~~ 

 

http://www.shoesandsox.com.au/

 誠俊好鐘意個catwalk 試鞋台,

不停行黎行去, 好開心,

著上新鞋之後, 重好識擺pose~~

 

活潑既誠俊相比起隔離個奶咀b,

醒目好多~~哈哈哈~~

 

 

呢間鋪頭真係design得好好,

佢方便大人幫小朋友試鞋,

set左個catwalk高台,

大人唔洗烏低身唔麻煩~~

 

買左對新鞋之後, 梗係著住去跑下跳下,

著旺佢喇~

行完街, 我地去左kings park~

 

星期日, kings park有好多人野餐~

 

 

玩玩下, 有兩個小朋友走黎同誠俊say hi,

但佢地全程都係對望, 係度笑, 無講過野~~

我地睇住佢地, 好好笑!!

 

同小朋友"望"完,

又走去追bird bird~~

 

經過今日之後,

我覺得可以帶誠俊去跑多d公園,

因為佢喜歡追雀仔, 坐草地,

玩得好鬼開心!!!

 

第一次去PERTH ROYAL SHOW (澳洲皇家嘉年華)

上星期六我地去左參與PERTH 一年一度既盛事 --- PERTH ROYAL SHOW (澳洲皇家嘉年華--柏斯站)

黎左澳洲咁多年, 一直都無去過, 因為爸爸好耐之前去過, 話無野睇, 同香港既冬日嘉年華差唔多, 但ROYAL SHOW 要俾入場費, 玩機動遊戲又要買飛, 唔抵去~~

今年有得去, 係因為朋友送左一張飛俾我地, 咁可以買少張飛, 慳返$27(真係好貴~~~), 咁就帶誠俊去睇下, 唔洗成日係屋企咁悶~~

因為想玩到夜晚8點睇埋煙花先走, 所以我地等仔仔訓埋晏覺先出門口~

第一次去嘉年華, 媽咪幫誠俊著得好出位, 好有氣氛~~~

登登登登~~~ 小蜜蜂!!!!

 

呢套衫好可愛, 係WOOLSWORTH買, 好平AU$8~~
今日終於有機會著~~~~

去到ROYAL SHOW, 可能係最後一日,
人唔係咁多, 推住BB車好好行, 唔迫~~~~~

 

 

誠俊SO FAR 參與左3樣活動,

第一: 睇雞雞

見到咁多大"BIRD BIRD", 仔仔好開心, 不停咁叫~~~

 

呢個區展示左好多唔同既家禽, 全部都係黎參加"選美比賽"~~

呢隻靚雞就係其中一隻冠軍, 真係好靚, 好似賣廣告既MODEL 咁~~~~~

 

跟住去左睇芝麻街表演 -- ELMO & FRIENDS

 

 

 

誠俊平時起身果陣, 電視都係播緊芝麻街,

所以佢知道ELMO係咩, 一開始唱主提曲,

佢就UN 下, FING手手, 好興奮~~~

 

 

 

 之後去左食品展館, 試食~~

仔仔食左3杯仔YOGURT, 食飽飽, 無耐就訓左.....

 

 

仔仔訓左, 我地都係四圍行下, 

年紀大左, 無膽玩D機動遊戲, 睇下人地玩就算~~哈哈~~~~

 

 

 

最後, 我地都無等埋放煙花就走LU~~~

因為太悶... 可能遲幾年, 仔仔D大, 會投入玩得開心D~~~~

 

反而, 全日既亮點係晚飯之後既"甜品之旅"~~

 

好好味既SAN CHURRO!!

最近有新既CHOCO DIP ~~

 

 

仔仔就食晒D用黎點朱古力既士多啤梨同香蕉[嗚嗚]~~

 

無打BLOG一排, 睇返D相, 仔仔又大個左~~~