係因為病魔追住我地一家
趕極都唔肯走，激死人！！！本身過左個快樂既週末，
到星期一，我放假係屋企湊仔，
重好賢良淑德咁煲鮑魚雞湯，
阿誠俊哥又好乖咁食玩訓，
重好開心咁攞我果joseph joseph 隔熱墊拉長晒，扮爸爸個dyson吸塵機~~
心情大家都好好，以為真係已經掃走所有悶氣~~~~~
點知到左下午3點幾，阿仔訓第2覺既時候，我就開始唔舒服，
有d作感冒，有d頭痛，諗住食粒藥，同阿仔一齊訓下會無事，
點知5點幾老公返黎，我好似差左，重尖寒尖凍，
但因為約左朋友出街食飯，又唔想推，咁我又食2粒panadol, 抖多陣就出門口。
食飯既時候都ok,無野，已經比平時食少左，但竟然會胃痛！
平時我好少會胃痛，咁我估可能唔係好舒服，個胃消化唔好姐，早點訓，好快無事！
但訓到半夜，成晚發夢訓得勁差，重開始肚痛胃痛肚痾一齊黎，上落床幾次之後，老公阿仔都俾我嘈醒晒，就係佢地俾我嘈醒呢個時候，我突然全身漂晒冷汗，好暈咁，訓左係床邊.....
當時我重清醒，只係好暈，同埋唔想成身汗咁上返床~~
老公知我咩事，但仔仔唔明白，佢係床度望到我咁樣，即刻好驚咁指住我EE哦哦咁叫~~~
再望多我幾眼，可能佢都覺得媽媽有d唔妥，就開始喊~~
跟住爸爸叫我無事就上返床，唔好訓地下，
因為仔仔好擔心唔知媽媽做咩，咁樣會嚇親佢~~
我抖一陣之後就上返床，誠俊就即刻撲埋我度，要攬攬~~
雖然好病，但見到仔仔咁樣，個心真係好sweet~~~
估唔到佢咁細過都已經識得，或者感覺到咁多野。
到第2朝去睇醫生，醫生見到我地2仔乸都話, "又係你地?"
最後我唔知點解會係腸胃炎，又無食D咩特別野，我食咩之前都有洗手架~~
唉~~病魔，你幾時走呀~~~~
我地一家都唔歡迎你呀!!!!!!!!!!!!!!!
快D走~~~~~~~~~~
No comments:
Post a Comment