話咁快就一歲~~

時間過得真係快，我個仔仔咁樣就一歲喇~
記得上年臨生之前果日重同婆婆齊齊去食KFC，
到左夜晚再同我個大肚影相留念~~

因為仔仔最後都唔肯轉向出口，
所以媽媽捱左一刀攞佢出黎，
記得果日天未光就起身出門口去醫院，
雖然第一次入手術室，但因為老公全程都係我身邊，
所以都唔係好緊張~

可能睇得電視多，我以為手術室係好細好暗，
點知我入到去，超大超光猛，
有好多唔同既醫護人員，
但大家都好輕鬆好愉快咁樣，
當時重開左收音機~

而最搞鬼既係我主診醫生黎到，Say hi 之後，
竟然問我老公頸上既相機係咩brand 同model~~
跟住就傾大談相機經....
唉....完全唔係我想像中咁既樣~~

仔仔出世果一刻，我因為訓係度睇唔清楚，
但當聽到佢第一下喊聲，即刻忍唔住感動到喊~~

跟住到我聯好針，check 好之後上到房，
仔仔已經係房等緊我，
婆婆見到我第一時間就同我講仔仔好似我，
到我自己第一眼望著自己個仔，
佢真係好似自己~~
同埋個樣好man，一睇就知係男仔~~

誠俊出世頭果幾日都未有名，
到第3日，爸爸就改左英文名俾佢，
但中文名一直到無咩頭緒~~

直至差唔多要攞出世紙，先好努力咁諗,
爸爸同我都上唔同既姓名網，改名網去研究,

最後誠俊係我同仔仔改既，
當然唔係因為誠俊哥果套劇集喇，
只係因為經過不同既研究，
發現呢個名對仔仔既命理都好好，
所以就決定誠俊做誠俊哥喇~~~

一歲既誠俊so far都係一個算合格唔錯既小朋友，
而家有10.5kg，一日食足5餐，另加4枝奶 (6安)，真係好鬼豐富~




早餐係屋企多數食米糊/麥片+yogurt 或者包包，
係學校morning tea 食生果/yogurt/多士,
lunch 就鬼佬野多，薯蓉/菜/意粉/pizza
下午茶係生果/yogurt/多士/cake
晚餐一定食飯仔，我用魚湯煮，
再加旦/魚/蔬菜/雞/羊，日日唔同，
佢可以食2/3個飯碗咁多~



飲食方面呢個小朋友唔係好洗擔心，
不過佢有樣野唔好就係好惡，
有時佢要既野，我唔俾佢，又或者遲少少俾佢，
佢就會鬼殺咁嘈~
惡到不得了~~
呢樣真係要慢慢教下佢~~
唔係第時做左小惡霸就弊喇~~