掃走悶氣, 快樂星期六~~ (有片睇)

自從上星期一家病完之後，呢個星期就算好返，

個人都好似懶懶行咁，無咩動力無咩精神。

唔好話打blog，煮飯都無咩心機，都唔知做咩。

去到星期五晚，打左個邊爐之後，感覺又好返少少，

星期六就出去行下，再散下d悶氣〜〜

我地係屋企食完早餐又晾埋衫，成12點先出門口，

我哋首先去Morley 行玩具反反城，要買條學利帶比仔仔，

想買其原因一來佢係行街嘅時候可以自在啲，

有條帶嘅幫助，我哋又唔怕唔知佢行咗去邊，

雖然有D人覺得呢條好似狗帶，但其實佢好好用，

因為好似誠俊咁細粒，你烏低身拖住佢隻手辛苦時，

佢舉雙手俾你拖又好辛苦。

有左佢就方便好多~

買完嘢肚餓去食lunch，

去到間餐廳俾佢個AU$15.9既海鮮拼盤吸引，

所以決定同爸爸一人一個，

估唔到個拼盤咁足料，味道都唔錯，AU$15.9，抵食!!!

 

因為我哋食海鮮BB無得食，所以攞咗餅餅黎安撫佢，

點知佢食晒D餅，見我地食緊野好忙，無人得閒理佢，

佢之後攞過食物盒黎玩，忽然唔知點解佢咁樣咬住個盒，

都唔知點樣學識，不過又幾過引，識得自我娛樂！
見誠俊咁乖無騷擾我地食野，我地就帶佢去同一個商場嘅波波池玩。
上次夜晚嚟過冇乜人，

今日星期六下晝就勁多人，

因為我要睇住架BB車，所以得爸爸同仔仔除鞋入去玩。

誠俊雖然識行，但心境始終係一個得一歲既小朋友，

佢唔係好識主動去玩，一開始入到去淨係識睇住人地玩，

跟住就好開心咁拍哂手掌喺度笑

好鬼傻豬

之後爸爸慢慢咁帶佢去玩

滑下滑梯騎下馬仔，

再拾下波波，好開心就過左一日。
出去行完街，又見到仔仔玩得咁開心，我個人心情都好返好多，

夜晚重好好心機咁煮左好好味既日式烏冬食，

好味半熟蛋~~

一次過掃走所有悶氣，迎接新一個星期！