不過都有D野值得記低既, 做一個小小既成長記錄。
一歲既誠俊哥現而10.5KG, 高77CM,
三圍數字就唔定， 食飽會大D， 去完便便又會細D～～
嘻嘻～～
飲食方面，
一如以往， 非常為食， 胃口好好～
今個星期開始俾佢食大人飯，無再另外煮飯仔俾佢，
即係我地食咩佢食咩，
不過當然都會相就下佢既，
好似煮飯加多少少水，等D飯軟D,
煮菜佢果D會煮淋D,
有太多汁, 太油或濃味既，會沖左熱水先~~
而家食左幾日，進展唔錯~~
佢都好肯食，無咩投訴~
其實佢食過既食物總類都好多,
除左豬牛羊雞魚菜, 蔬菜, 水果,
蟹, 龍蝦, 豆腐, 鮮奶.....
基本上我地食咩，每樣都會俾佢食d,
但有d野食到而家都無俾佢食,
好似香腸, 午餐肉, 零食, 果汁, 薯條.....
希望可以盡量推遲,
再大個d先俾佢食呢d唔好既食物~~
(雖然爸爸媽媽都經常食~~~嘻嘻~~)
不過最近幾次，佢要求自己用匙餵自己既意識好強,
係咁搶我枝匙～～
咁我都會俾佢試，
而且佢都控制得好好，
啖啖都放到入口，
但佢餵自己既時候，支匙一唔平, D飯就跌晒~~~~~~~~
搞到次次食完飯，
個地下都一齊食埋
~~行動方面，
誠俊哥而家行路行得唔錯，
行得好快，
呢幾日開始想學行一級級既路,
即係好似出門口果級仔，
佢會扶住門框, 慢慢咁先伸一隻出去，
之後再行埋第2隻腳,
10 次有7次都⋯⋯⋯⋯仆倒,
不過佢都好努力咁學，
應該好快就成功~~
相反爬高、企高呢D就學得超快，
2下就爬左上箱汽水度, 搞雪櫃既磁石~~
一係就反轉個洗衣籃，
爬上去再企係上面, 跟住重笑笑口拍手手~~
見到都真係鬧佢唔落(因為佢好鬼可愛!)，
但又唔可以俾佢做D咁危險既動作~~
次次都捉返佢落黎，俾佢玩其他玩具，
分散注意力， 佢好快就唔記得～～
講野方面，
而家識講媽媽/媽咪, DADDY/爸, Mummum, 包包, 波波,
唔算好多，不過就明白多左我地既講野，
爸爸俾條尿片佢，叫佢俾媽媽, 佢識做~
有時叫極佢都理我，之後扮野同佢講byebye,
佢知道媽媽會走，佢就會走返過黎~~
行超級市埸， 我行左去第2行，
爸爸問佢， 媽媽呢？
佢識坐係車度4圍望， 搵我，
之後離遠見到我，佢就係咁同我笑～～～
每次佢“成功”搵到我之後，
我都會攬下佢， KISSKISS，
當鼓勵佢既叻叻！！！
No comments:
Post a Comment