2週回顧

上兩個星期既生活, 真係好悶, 好乏味~~~

首先, 我地3個又好似"車輪轉"咁輪住病~~
開始先係誠俊流鼻涕同咳. 之後到我, 再到爸爸,
大家一病, 全家就無晒生氣, 唉~~

加上爸爸上星期全天侯教潛水,
平日晚晚成9點先返,
星期六日又要教全日,
成日星期得我一個人湊住仔仔,
感覺好奇怪, 好似唔知點咁~~

總知媽媽既心情就麻麻喇~

不過, 誠俊無左爸爸同佢玩, 都仍然好開心~
前幾日, 佢又學識講多一樣野, 就係----蕉蕉~~





果晚係屋企食完飯, 俾佢見到生果籃有隻香蕉,
其實都買左幾日, 但因為大家都咳, 所以得食個睇字~~



咁識誠俊既都知, 佢最鐘意食香蕉,
果一刻佢望住隻蕉, 望到好似同舊朋友10年無見咁樣~~
咁我見佢咁想食, 咁就同佢講,
你講"蕉蕉" 或者"NANA", 咁我就俾你食~~


跟住佢仍然望住隻蕉, EE哦哦,
我都同佢講, 你識叫就俾你食喇~~


其實我知佢係唔識講, 又唔想俾佢食, 所以先咁講~~

點知佢望住隻蕉, 再哦一輪之後,
佢突然爆出一句, "蕉蕉趙"....

呀~~~~~ 媽媽就係咁俾佢擊倒~~~~
估唔到香蕉既威力既咁勁~~~

但第2 日, 佢又唔講"蕉蕉" ,
但就望住果生果籃講"NANA"~~
搞到我都分唔清, 其實佢係咪真係識架!!??

不過有樣野我知佢係真係識既, 就係"HOT"&"熱熱"~
因為之前俾佢摸過幾次熱野, 包括熱水杯, 焗爐,
跟住佢就識驚, 怕怕,
所以而家同佢講D野係"HOT", 佢會縮手~~
好叻叻~

而媽媽最想誠俊快D學識既,
就係用匙食野~~

佢用手攞野食, 已經食得好好,
D手指仔都好有力~~

不過用匙食野就重未好成功,
一時得, 一時唔得, 就好似咁...........

要再努力練習先得!!
而媽媽暫時就要繼續努力抹[灰]~~